GURE HERRIA

Amasa-Villabona N-1 errepidean kokatua dagoen herri bat da, Donostiatik 20 kilometrotara aurkitzen dena. Zehazki, Oria ibaiaren bailaran aurkitzen da, Gazume eta Uzturre mendiak zeharkatu ondoren.

Gure herria Tolosaldeako eskualdean dago, Aduna, Zizurkin, Irura, Anoeta, Tolosa, Ibarra, Alegia, Ikaztegieta eta Legorretarekin batera. Amasa-Villabona Aiztondo bailarako zati ere bada.

Amasa-Villabona industria sektorean oinarritzen da batik bat, bere inguruan hainbat industrialde dituelarik. Era guztietako industriak sortu eta garatu dira bertan: paperarena, mekanizatuen lantegiak, marmol sektorea, e.a. Zorionez, industria sektoreak ez ditu beste sektore ekonomikoak zapaldu. Izan ere, gure herriak merkataritza eta ostalaritza jarduera indartsua du. Horren adierazle dira, herrigunean aurkitzen diren hainbat eta hainbat denda eta taberna. Ez da harritzekoa, beraz, 5.800 biztanle dituen herri txiki bat izan arren, giro ezinhobea eskaintzen duen udalerria izatea, kalitatezko zerbitzu eta azpiegiturekin: hezkuntza, kirol instalakuntzak, osasun zentroa, musika eskola...

Herriak kokapen pribilegiatua du. Inguruko herriekin oso ongi konektatua dago, baita Gipuzkoako hiriburuarekin (Donostiarekin) ere. Halaber, Amasa-Villabona mendiz eta bailarez inguratua dago; haiek are eta ederragoa egiten dute herria. Mendiek eta larreek bisitariei jarduera-sorta zabala eskaintzen diete, naturaz gozatu dezaten.

IMG 7563-05w
Amasa-Villabonan ongi bizi gara, bizi-kalitate ona duen herria da; baina ez gara horrekin konformatzen. Beti dago zerbait hobetzeko, eta amasa-villabonatarren beharrak aldatzen doaz denborarekin. Horregatik, gure nahia da Udalean dagoenak herritarren behar eta nahi horiei erantzuna ematea, beti bere ongizatean lehenetsiz. Aldaketak egin eta hobetu, gure osasunaren, ekonomiaren eta ingurumenaren onerako. Etorkizunean Amasa-Villabonan bizitzen jarraitu nahi baitugu.

GEOGRAFIA

Villabona Tolosako barruti judizialari dagokio. 17,8 km2-ko zabalera du eta itsasoaren mailarekiko altitudea 128 m-koa da herrigunean.

Udalerria Oria ibaiak eratutako ibarrean dago eta haren lurraldea ipar-ekialdetik hego-mendebaldera igotzen da Urdelar mendirantz. Hidrografia sareak ibai nagusia du –Oria ibaia– eta honen ertzean dago hiribildua. Halaber, beste zenbait erreka Oria ibaira edo Leitzaran ibaira isurtzen dira.

Lurraldearen %70a basoek osatzen dute. Bertan, pagoak, haritzak eta gaztainondoak ditugu, berez, landaretza atlantiko-hezeari dagozkionak. Baina, gizakiaren neurri gabeko esku-hartzeak, bertako landaretza ia ezabatu du, eta intsignis pinua zabaldu da. Larre naturaletan eta alfer-lurretan garoa, txilarra, otea.... aurkituko dugu.

N-1 errepidea (Madril-Irun) igarotzen da Villabonatik. Horrez gain, RENFEko geltokia du eta hainbat autobus zerbitzu.

Harremanetarako